ГАЗАР ТАРИАЛАНГИЙН САЛБАР ДАХЬ ИННОВАЦИ, ТЕХНОЛОГИ НЭВТРҮҮЛЭЛТИЙН АЧ ХОЛБОГДОЛ

Оршил

     Газар тариалангийн салбар нь Монгол Улсын хүнсний аюулгүй байдал, эдийн засгийн хөгжил, хөдөө орон нутгийн хөдөлмөр эрхлэлтийг дэмжихэд чухал үүрэгтэй салбар юм. Ургамлын гаралтай хүнсний бүтээгдэхүүний дотоодын үйлдвэрлэлийг нэмэгдүүлэх, импортыг орлох бүтээгдэхүүн үйлдвэрлэх, экспортын боломжийг өргөжүүлэхэд газар тариалангийн үйлдвэрлэлийн үр ашиг, чанарыг дээшлүүлэх шаардлага улам нэмэгдэж байна.

     Орчин үеийн нөхцөлд уур амьсгалын өөрчлөлт, усны нөөцийн хомсдол, хөрсний доройтол зэрэг асуудлыг даван туулахын тулд шинжлэх ухааны ололт, инноваци, дэвшилтэт техник, технологийг газар тариалангийн үйлдвэрлэлд нэвтрүүлэх нь тогтвортой хөгжлийн үндсэн нөхцөл болж байна.

Инноваци гэж юу вэ?

           Инноваци гэдэг нь шинэ мэдлэг, судалгаа, технологи, бүтээгдэхүүн, үйлчилгээ болон үйлдвэрлэлийн арга барилыг эдийн засаг, нийгэмд үр ашигтайгаар ашиглах үйл явц юм. Газар тариалангийн салбарт инноваци нь зөвхөн шинэ техник, тоног төхөөрөмж ашиглахаас гадна үрийн шинэ сорт, усалгааны дэвшилтэт систем, хөрс хамгаалах технологи, мэдээллийн технологид суурилсан удирдлага, ургацын чанарын хяналт зэрэг олон чиглэлийг хамардаг.

Газар тариалангийн салбарт инноваци нэвтрүүлэхийн ач холбогдол

Инноваци, технологийг газар тариалангийн үйлдвэрлэлд нэвтрүүлснээр дараах үр дүн гардаг.

• Ургацын хэмжээ, бүтээмж нэмэгдэнэ.
• Бүтээгдэхүүний чанар, стандарт сайжирна.
• Ус, бордоо, түлш зэрэг нөөцийн ашиглалт үр ашигтай болно.
• Хөрсний үржил шимийг хамгаалах боломж нэмэгдэнэ.
• Уур амьсгалын эрсдэлийг бууруулахад дэмжлэг үзүүлнэ.
• Үйлдвэрлэлийн зардал буурна.
• Хүнсний аюулгүй байдал сайжирна.
• Экспортын шаардлага хангасан бүтээгдэхүүн үйлдвэрлэх боломж нэмэгдэнэ.
• Салбарын өрсөлдөх чадвар дээшилнэ.
• Судалгаа, үйлдвэрлэлийн уялдаа

 

 

Судалгаа, үйлдвэрлэлийн уялдаа

Шинжлэх ухааны байгууллага, их, дээд сургууль, тариаланчид, үйлдвэрлэгчдийн хамтын ажиллагаа нь шинэ технологийг амжилттай нэвтрүүлэх үндэс болдог. Судалгааны үр дүнг бодит үйлдвэрлэлд ашигласнаар өндөр ургацтай сорт нутагшуулах, өвчин хортонтой тэмцэх шинэ арга хэрэглэх, усалгааны үр ашигтай систем нэвтрүүлэх зэрэг олон давуу тал бий болдог.

Судалгаа хөгжлийн төвийн үүрэг

Хүнс, хөдөө аж ахуйн чиглэлийн судалгаа хөгжлийн байгууллагууд нь газар тариалангийн шинэ технологийг туршин баталгаажуулах, үйлдвэрлэгчдэд зөвлөх үйлчилгээ үзүүлэх, сургалт зохион байгуулах, инновацийг үйлдвэрлэлд нэвтрүүлэх, зуучлах үйл ажиллагааг дэмжин ажилладаг. Мөн хүнсний ногоо, жимс, жимсгэнэ, хүлэмжийн аж ахуй, ургамал хамгаалал, зоорь,  чиглэлээр судалгаа хийж, үр дүнг тариаланчдад хүргэдэг.

Дүгнэлт

Монгол Улсын газар тариалангийн салбарын тогтвортой хөгжил нь шинжлэх ухаан, инноваци, үйлдвэрлэлийн нягт хамтын ажиллагаанд тулгуурлана. Судалгааны үр дүнг үйлдвэрлэлд үр ашигтай нэвтрүүлж, тариаланчдын мэдлэг, ур чадварыг нэмэгдүүлэх нь ургацын хэмжээг өсгөх, хүнсний аюулгүй байдлыг хангах, импортыг орлох болон экспортын бүтээгдэхүүний үйлдвэрлэлийг өргөжүүлэх, олон улсын зах зээлд өрсөлдөх чадварыг дээшлүүлэхэд чухал ач холбогдолтой юм.